Әдебиет - ұлттың жаны. Ұлттық сана, тағдыр, жан жүйесі - көркемөнердің басты тақырыбы. Таптық жік арқылы әдебиет жасалмайды...
Жүсіпбек Аймауытұлы

Басты бет
Әдеби үдеріс
Ақын Серік Тұрғынбекұлының бір күні (Фоторепортаж)

24.02.2017 2797

Ақын Серік Тұрғынбекұлының бір күні (Фоторепортаж)

«Қаламгердің бір күні» айдарының кезекті кейіпкері – белгілі ақын, «Алаш» әдеби сыйлығының иегері, Қазақстанға еңбегі сіңген қайраткер Серік Тұрғынбекұлы.

021fdab2dcc53d6751b4bfcbc1dd3c8a.JPG

Серік Тұрғынбекұлымен өткізген бір күніміз ерте таңнан басталды. Таңғы сегіздерде ақынның үйіне келіп, есігін қағып тұрдық. Негізі, Серік ағамыз ерте тұрғанды ұнатпайды екен. «Түске қарай асықпай, ұйқымды қандырып бір-ақ оянамын», – дейді өзі. Ал бүгінгі ерте тұрғанының бір себебі біз болсақ, тағы бір себебі – Астана қаласы әкімі Әсет Исекешевтің халыққа есеп беруі. Ақын ол шараға арнайы шақырылған. Соған барады. Әрине, біз де бірге барамыз. Есеп беруден кейін Серік аға жақында қайтыс болған танысының үйіне көңіл айтуға Конгресс-холл жанынан таксиге отырып кетті.

Түстен кейін қайта жолыққан біздер, фоторепортажымызды ақынның үйінде жалғастырдық. Жанында ағайындас інісі бар екен.

Серік ағаның әр күні осылай, шақырылатын жиын-кештерге бару, арасында өлең жазу, кітап оқу, кешке қарай таза ауада серуен жасаумен өтеді екен. «Бос күнім жоқ, күнде бір жерге шақырады, өздерің секілді журналистер хабарласады», – дейді, ақынның өзі. Бізге өлең оқып, ән айтып, кітапханасымен таныстырып, арасында шәй берген (Серік Тұрғынбекұлы – көптеген танымал әндердің авторы) Серік ағамен бұл күніміз есте қаларлықтай өтті. Кейіпкеріміз ақын болғаннан кейін бұл жолы сөзді азайттық. Фотосуреттерді Серік ағаның өз өлеңдерімен берсек, ақынның тұлғасын аша түсерміз деген ниетпен өздеріңізге осылай ұсынып отырмыз.

7c7605ef05dd5f54d756372ac738592b.JPG

30e6bf60a5eb855b4e8bd911163a3561.JPG

dafe31df1f8f852a548cc58891c978a9.JPG

Бір жаңалық іздеймін жауған қардан,

Баудан пана іздеймін,

Таудан – қорған.

00f093be1dd355e039d218282f45022e.JPG

Осы күні… осы күні жүрегім

Тоқтатпайды – тар кеудемді жиі ұрып.

Ойлай-ойлай әлім кетті бойымнан,

Қайнай-қайнай қаным кетті сұйылып.

Ешкім енді емдей алмас дертімді,

Бүкіл әлем дәрігері жиылып.

Тұр екен ғой, тұр екен ғой

Дүние-ай,

Піскен алма бұтақтары иіліп.

Қандай қиын…

Қандай қиын құр қалған

Дастарханда тұрған дәмнен бұйырып.

… Енді бүгін «бір көрсем» деп тілеймін,

Құдайыма қайта-қайта сыйынып!

d66d8535277982266bd4cf5a190f8f49.JPG

Арыны күшті

Ақын ем,

Жалғаған

Жақын-жырақты.

Құйғытып келе жатыр ем,

Қапысын тауып құлатты.

Құлатты өңшең жырынды.

Қадірін білмей қаламның.

dd9ee04b79224a448ee63feec4571105.JPG

Кетпей-ақ қойды-ау қыс бірден,

Аязы бар ма үскірген.

Аяқта әлі бәтеңке,

Түскен жоқ тоным үстімнен.

Қайда әлгі...

Қайран көктемім.

Қайрылмай неғып кеткенің?

Қажаған әбден кәрі қыс

Шеше алмай жатыр шекпенін.

7c5b9ca05bf2e6d352e45ca0c604ae9d.JPG

Ұялаған кеудемнің түбіне мұң,

Қорықпаймын келсе де бүгін өлім.

Шүберекке түйіп ап қу жанымды,

Шындық үшін шырқырап жүгіремін.

bd4cf906f7774436ed13212f8e73dbe2.JPG

Атымды шақырмаймын

Атақпенен,

Ісімді танытпаймын

Шатақпенен –

Мен үшін қалам – қанжар,

Сол қанжарды

Бұлтартпай әділдікті айту үшін,

Биліктің тамағына тақап келем.

26d24e2a9fac6cfe62f11f517ce3dd56.JPG

Махамбеттен үлгі алдым,

Қасымдардан.

Қалған бір көз мен шығар

асылдардан.

Ашық күнде

Аспаннан жай түскендей,

Ащы даусым шығады –

Ашынғаннан.

ceec099e08ba5477697141ca89f43057.JPG

Ағаш едік,

Көмір болдық.

Алтын едік,

Темір болдық.

Дауыл едік,

Өкпек болдық,

Бауыр едік,

Өкпе болдық.

6a3ed61742165c0e0e8d9f3911275e10.JPG

Біреулерді мақтаудан да қорықтық,

Біреулерді даттаудан да қорықтық.

Қоғам үшін көз жасымен жазылған

Қолжазбаны сақтаудан да қорықтық.

5999f4bebab9a16a6b65517862df1fed.JPG

Бұл өмірде көп қақтығыс,

Көп егес,

Атыс-шабыс,

Алыс-жұлыс,

Төбелес,

Достарым да толып жатыр,

Ал бірақ

Азын-аулақ жауларым да жоқ емес.

c6221d08a37145e91bd1f8d1c5c6b75d.JPG

Өз-өзіңмен ақталып,

Күпінесің мақтанып.

Күміспенен күптеліп,

Алтынменен апталып.

Жарығың мен нұрыңды

Жария ғып жатасың,

Жарылуға шақ қалып…

Осы мені қинайды,

Елдің ар-иманы,

Құлы болып дақпырттың,

Табанында жат жұрттың

Жатқан шақта –

Тапталып!

a48c61768c666cf88ecb6807c70a7712.JPG

Айтшы маған, әлде осы сайран ба өмір,

Қайда барып қайтпайды қайран көңіл?!

Жүрегімді жұлмалап жүр осы күн,

Кейде артық, кейде кем жайлар небір.

c7ff9f55d11ffa4bedab071cc1bd94e4.JPG

Күндер өтті

Қиналған, назаланған.

Көрер көзге қор болған, қаза болған.

Ағалардың аруағы елестейді,

Жазықсыздан-жазықсыз жазаланған.

a977ed06f06e4b2a291cafc538597763.JPG

Қуаныштан көңілдің мұңы басым,

Барған сайын бақытқа құнығасың.

Ғұмыр бойы жүргенің күн-түн қатып

Толтыра алмай тірліктің құмырасын.

e1d8f6a8afacd760d645249942c52b5e.JPG

Ілесіп ылауына қиын көштің,

Бейкүнә –

Бейшараның күйін кештім.

Мемлекет

Мәселесін шешкенімен,

Шеше алмас

Жүректегі түйінді ешкім.

86bcfc0beb548b3d7914ff647ba3128f.JPG

Тағдырым болмай тұрлаулы,

Қуырдақ қылдым қу жанды...

Сілікпем қанша шықса да,

Қоймай-ақ келем жырлауды!

77c38f95f3d3ab7661bd26ed25713b0f.JPG

Тірлікте ойламаймын тыным бар деп,

Қиналып қажымаймын мұңым бар деп.

Өсиет ата-бабам айтып кеткен,

«Дос болып, бауыр болып тұрыңдар!» – деп.

f44054c0f507f19957e77a29c31ca531.JPG

Бір құдірет

Бар екенін білемін,

Онсыз тірлік тар екенін білемін.

Алып шығар алапаттың ішінен,

Намыс пенен Ар екенін білемін.

1a37b9f65db0bf4f439f2458429b61b2.JPG

Ел қамын жеген ұлмын,

Түскенше жағым қашан.

Қарайып неге жүрмін,

Халқыма танылмасам?!

ccc83fe7234727253cdddcfa3789233e.JPG

Оңай емес

Ойланғанға тірлігім.

Біреуге – қас,

Біреуге – дос, құрбымын.

Жайшылықта жарқыл қағып жүргенмен,

Жасырмаймын:

Менің де бар бір мұңым.

d6bc366dd4519eb4a9dfa52817b7a917.JPG

Айықтырмай тұманын,

Не боп кетті мына күн?!

Көбейгендей келеңсіз

Көңілдегі күмәнім.

d55c2007fdbbb5aac6bcdd5ebfab556a.JPG

Ойлар... ойлар... ой деген кетер емес,

Кейде тіпті тудырар бекер егес.

Көңіліме сенбеймін...

Көңіл деген...

Көңіл деген қай жаққа жетелемес...

ca7e69dc397817ebc5f2e5ebb18f05ae.JPG

2042ee99c5239a3dbf924ea30fe7fe5f.JPG

b931c9ed8b88bb92efca3590aa60b242.JPG

c43564c402b4bbf2e0ee53c94c0a4ccd.JPG

Бұл өмір

Саған да – сын,

Маған да – сын.

Әрине, дос болған соң бағаң басым.

Дүниенің бір бақыты сол емес пе?

Аман-сау бірге жүрсе замандасың!

f3bbfb7a542356fcf5bbcfaeae039779.JPG

ad6d54567d99981bc93f8f589b7d9400.JPG

d1809332e58200689d1327e190ffac0e.JPG

Мен ақынмын!

Ей, досым, мен ақынмын!

Қауырсын бар астында қанатымның.

Тас төбеңде жұлдыздай жарқыраймын,

Қарап қалсаң – ішінде қара түннің.

9582cd615ed8609421598d0786d681d5.JPG

Мен ақынмын!

Сен, сірә, нанасың ба?

Күйесің бе, мен құсап жанасың ба?

Ұйқастырған өлеңші толып жатыр,

Жоқпын! Жоқпын олардың санатында!

00448590a17c54a78f20e61232acc707.JPG

Мен ақынмын!

Сен, сірә, сенесің бе?

Капитанмын өлеңнің кемесінде.

Өтіп келген өлең-жыр майданынан

Жауынгермін!

Сау жер жоқ денесінде...

cf1eac6f81eaddd4148348398c0476de.JPG

Мен ақынмын!

Ақынмын десем егер,

Айтқан сөзім он рет еселенер.

Шумақ-шумақ өлеңді тиеп алып

Көз алдымнан керуен көше берер.

9660c0f93dffdb7b7c882314fce99b01.JPG

Компьютер

Керек емес,

Кілемің де,

Еңбекпен алады оны біле білген.

Сақтайды нағыз адам

Мақтанбай-ақ

Алтынды төсінде емес,

Жүрегінде!

589a0db68097720949fba4f6311ef399.JPG

Кешір мені!

Ақ қағаз, сия, қалам.

Сені иесіз тастамас зиялы адам.

Кісі көңілін әуелден қалдырмайтын,

Кеудемде бір ізгілік ұялаған.

9065a258f444541ef04b50e9786f6665.JPG

Әр нәрсеге болам деп алаң мына,

Кейде сирек аламын қаламды да.

Дүниеге келген соң бір борышым,

Бар екенін білемін ел алдында.

e71ebcb13ae66a3978b68533ee134f0c.JPG

Бұл өмірге қуаныш боп,

Көрік боп,

Адалдыққа, махаббатқа жерік боп,

Өмір сүріп жүргендердің ішінде,

Санай берсең, бәрінен де «Серік» көп.

23276dc756f20f9a9fe8c6d4640d749e.JPG

Сен де Серік,

Мен де Серік –

Танып қой.

(Серіктерден көз сүрініп, жалықты ой).

Ал, бірақ та,

Баласына кім болсын

Жаман есім бермейтіні анық қой.

f661febc93a2382de1a28c52e51a46fd.JPG

Суға салсаң сол темір асылданып,

Жайнайды жаңбырдан соң жасыл жарық.

Ақын болсаң жүріп көр өлең жазбай,

Түсінерсің сен мені сосын барып.

3e8d213be8740b86d3e6019bac9cecf4.JPG

Босағасын паналамай жат елдің.

Алған беттен,

Айтқан серттен таймайтын,

Ахметпін,

Міржақыппын,

Сәкенмін!

Мен ұлтшылмын –

Кінәласаң, кінәла.

Сыннан,

Міннен болған дейсің кім ада?!

Тым биікте,

Құзар шыңның басында –

Тасқа барып бітеді ғой қына да.

297ff81f7d405b546a2e062951673b73.JPG

Сен жастай қалдың...

Суын қанып ішпедің тас қайнардың.

Ал мен болсам – алқынып аққан бұлақ,

Алтыдан жетіге сәл аспай қалдым.

11976d1a44e462a3913e388fb49df9e0.JPG

Осылай сенің бағың жанбай қалды,

Жоқтау айтып жыладың, қандай зарлы.

Көңілде шер бар еді, көзімде жас,

Сол жас бірақ намыстан тамбай қалды.

08e6178aff937af8be818f2cf2e5d2ae.JPG

6664e168a4a5fb39fa045505fb22a64c.JPG

646e69de1a00a3c34492ff0538efe05d.JPG

Жұбатардай дерт көңілді,

Жұмбақ болып ой терең.

Шымырлатып шертпе күйді,

Шертпей қойсаң қайтер ем?!

d8fc07a5bfd87b42b20f93f223700aa7.JPG

Құр айғайдан әншінің сөзі басым,

Жанға – қуат, бойға – күш, азық алсын.

Жүректерден жүрекке жеткізді олар,

Шашпай-төкпей халқымның қазынасын.

27dff211bef0848f9ab028e3f3cb8f13.JPG

a203a0fe4be58dc8e71cd9176745ce5e.JPG

ef674135c342da0362d1dbff9458dca6.JPG

46c27e26d2888d35881eb6648183adc9.JPG

Дастархан дәм татырып адал астан,

Көріссе құшақтасып – амандасқан.

Бар әлем сиып кетсе біздің үйге,

Бақыт бар демес едім одан асқан!

858b42dcff2f5fdfe091dfe13621df1e.JPG

5031abffe35403fb92030fac7b4a9e55.JPG

b6d9a3cb64b69917974510d5ae2dc874.JPG

13e16b34c86461d8cd626ca84d0d250a.JPG

7f9a21fae0bc4ca6d25511e058f4ef3f.JPG

Бастайын «бисмилла» деп сөздің басын,

Тағдырым таланыма кез қылғасын.

Жазайын ақиқаттың сиясымен,

Қаламға қоса құйып көздің жасын.

a7d2d726b954d0ff4953fe959f475a4f.JPG

f99675c3d24046e4f4448cc0ec055287.JPG

Өлең де

Жол сияқты

Әлі де жүрілмеген.

Бақытың сол сияқты

Қолыңа ілінбеген.

1b6da11dfad3cd0cfd35dcda31f229ff.JPG

Өлең де бір

Қымыз сияқты,

Қанша жұтсаң тамсантқан.

Өлең де бір қыз сияқты

Қолға түспей аңсатқан.

87f83a83e0f6a8aef11d2d1a26252b7b.JPG

Өлең де бір

От сияқты

Жанатын лаулап бірден.

Өлең де бір доп сияқты

Қақпаға заулап кірген.

378b4d0267d63e90d37e1b7fb01939da.JPG

Өлең де бір

Қашқан киік,

Тоқтамас ештеңеге.

Қашан да аспан биік

Қарасаң тас төбеңе.

a166290e749e726a70137369cffa320e.JPG

Жалғанның желбіресе Туы шыңда,

Жақындап бұлттың өзі жуысуға.

Бар ақыл,

Бар парасат басын қосып,

Қала тұр –

Уыз нұрдың уысында.

4586d909d5af36d1a92c3669b098d821.JPG

Басына аумайтындай бақ тұнғасын,

Біледі ел – мұндай қала таптырмасын.

Бөгенбай –

Ол да өзінің даңғылымен,

Дайын тұр жіберуге аттың басын.

e347f676e9c7e7e25a3650bf9028b5f3.JPG

Өлгендер қайтып келмейді.

Б.Соқпақбаев

– Өлгендер қайтып келеді, –

Десем сен,

Әсте сенбейсің.

Себебі, досым,

Себебі –

Сен, сірә, мәңгі өлмейсің.

3501540025182d3104af20e907ab4e47.JPG

Болғанмен

Баста бір өлім.

Өлмейтін жанға саналған.

Себебі, сенің жүрегің –

Қара тас болып жаралған.

aabec05dc0cd38e44d55de3b909f6255.JPG

Еңіреп, жылап

Есіл жыр –

Боздайды күнде інгендер.

Өлексе күйін кешіп жүр,

Өлгісі келмей жүргендер.

6f2355fa1fc026bdc99f3e36582e03c4.JPG

Жамылып атын тірінің

Жүрегі ғана дүрсілдер…

Солардың мен де бірімін,

Қыбырлап жүрген –

Құр сүлдер.

Бірі бар есте,

Бірі ұмыт,

Бірінің қалмай дерегі.

…Өлгендер қайта тіріліп,

Тірілер күнде өледі.

e89764c37559e55627d718c5545cffb3.JPG

Болыпты кімнің дегені,

Терең жоқ әсте тартылмас.

Жемқордың ішіп-жегені,

Өзінен ғана артылмас.

Біреудің былғап тұнығын,

Биіктеу тұрды ол сенен.

5d93d7e3f5802a24d620c5c0bc36bc8c.JPG

Өйткені –

Олар ғұмырын,

Байлықпен ғана өлшеген.

Күнбе-күн ойнап күлгенмен,

Құбылтып жүзін, тән бояп.

Құлқыны өмір сүргенмен,

Құр тірі жүрген жандай-ақ…

ce57c4292787a8ad3269f93359e53a89.JPG

Сиқыршының

Жылтырақ таяғындай,

Жастық шағым

Жарқ етті –

Жай оғындай.

Кәрілікке

Килігіп иек артқан –

Мендей байғұс пендеңді ая, Құдай!

7c6e8b18bd5040081dbaf2e340a07827.JPG

Медет тұтам қай іні,

Қай ағайды,

Ана болып енді кім

Аялайды?!

Өзің ая,

Жаратқан бұл пендеңді –

Ал, адамдар,

Бір-бірін аямайды.

ea8baeb8fbf87a3893661d1c921abfbb.JPG

68729236ccf2a7c59cf169615bf070a5.JPG

d918022646e1ea68182da4d3aa2bb5c4.JPG

5cc5a287481d579df05fde3552f99893.JPG

Мен ақынмын!

Бәріңнен биіктемін!

Шүберекке жанымды түйіп келдім.

Алатаудан кем болмас абыройым,

Аман болса,

Сау болса сүйікті Елім!

Ақын Серік Тұрғынбекұлының кітапханасы

Марфуға ШАПИЯН


Біздің Telegram-парақшамызға жазылыңыздар! Бізбен бірге болыңыз!


Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. Adebiportal@gmail.com 8(7172) 79 82 12 (ішкі – 112)

Мақала авторының көзқарасы редакцияның көзқарасын білдірмейді.


(0)
Пікір қалдыру:
Captcha

Көп оқылғандар